ഒരു വട്ടം കൂടിയെന് ഓര്മ്മകള് മേയുന്ന
തിരുമുറ്റത്തെത്തുവാന് മോഹം (2)
തിരുമുറ്റത്തൊരു കോണില് നില്ക്കുന്നോരാ
നെല്ലി മരം ഒന്നുലുത്തുവാന് മോഹം
മരം ഒന്നുലുത്തുവാന് മോഹം
അടരുന്ന കായ്മണികള് പൊഴിയുമ്പോള്
ചെന്നെടുത്തു അതിലൊന്നു തിന്നുവാന് മോഹം
സുഖമെഴും കയ്പും പുളിപ്പും മധുരവും
നുകരുവാന് ഇപ്പോഴും മോഹം
തൊടിയിലെ കിണര് വെള്ളം കോരിക്കുടിച്ചെന്തു
മധുരം എന്നോതുവാന് മോഹം
എന്തു മധുരം എന്നോതുവാന് മോഹം
ഒരു വട്ടം കൂടിയാ പുഴയുടെ തീരത്തു
വെറുതെ ഇരിയ്ക്കുവാന് മോഹം (2)
വെറുതെ ഇരുന്നൊരു കുയിലിന്റെ പാട്ടു കേട്ട്
എതിര് പാട്ടു പാടുവാന് മോഹം
എതിര് പാട്ടു പാടുവാന് മോഹം
അതു കേള്ക്കേ ഉച്ചത്തില് കൂകും കുയിലിന്റെ
ശ്രുതി പിന്തുടരുവാന് മോഹം
ഒടുവില് പിണങ്ങി പറന്നുപോം പക്ഷിയോട്
അരുതേ എന്നോതുവാന് മോഹം
വെറുതേയീ മോഹങ്ങള് എന്നറിയുമ്പോഴും
വെറുതേ മോഹിക്കുവാന് മോഹം
വെറുതേ ഈ മോഹങ്ങള് എന്നറിയുമ്പോഴും
വെറുതേ മോഹിക്കുവാന് മോഹം
വെറുതേ മോഹിക്കുവാന് മോഹം
