Year: 2011
ഇരുപത്തിയഞ്ചു പൈസ ഓർമ്മയാവുന്നു
അകാലമൃത്യു വരിക്കാൻ പോകുന്ന ഇരുപത്തിയഞ്ചു പൈസയ്ക്ക് ആത്മശാന്തി നേരുന്നു 🙁
പണ്ട് ഒത്തിരി മിഠായികൾ നീ കാരണം നുണഞ്ഞിറക്കിയ ആ മധുരസ്മരണയിൽ എന്നും ഞങ്ങൾ നിന്നെ ഓർക്കും. ഇനി കേവലം പതിഞ്ചുനാൾ കൂടി കഴിഞ്ഞാൽ പിന്നെ നിന്റെയാ മധുരസ്മരണകൾ മാത്രമാണു ഞങ്ങൾക്കു തുണ..
പണ്ടു നിന്നെ ഉപയോഗച്ച് വാങ്ങിച്ച പല്ലിമിഠായിയും ഓറഞ്ചുമിഠായിയും കടലയും പാലൈസും കോലൈസും ഒക്കെ ഇന്നു വിസ്മൃതിയിലേക്കു നീങ്ങിക്കഴിഞ്ഞു, സഹചാരികളിൽ മിക്കവരും എന്നേ കാലയവനികയ്ക്കുള്ളിലേക്കു വിലയം പ്രാപിച്ചു. നീ മാത്രം ഇങ്ങനെ മൃതപ്രായയായി ഇനിയെത്രനാൾ എന്നുമെണ്ണി കാലം കഴിച്ചുവരികയാണെന്നറിയാം. വേണ്ടപ്പെട്ടവരിതാ നിനക്കു ദയാവധം കനിഞ്ഞനുവദിച്ചിരിക്കുന്നു. ജൂലൈ ഒന്നു മുതൽ നീ വെറും ഓർമ്മ മാത്രമാവും. എങ്കിലും ജൂലൈ 30 വരെ നിനക്കീ ലോകത്തിന്റെ ശ്വാസം ശ്വസിക്കാം. നിന്നെ നൽകിയാൽ റിസർവ്ബാങ്ക് പുതിയ പൈസ തന്നു സഹായിക്കുമത്രേ!
വല്യമ്മയുടെ കോന്തലക്കെട്ടിൽ നിന്നും അമ്മയുടെ പേഴ്സിൽ നിന്നും അനിയത്തിയുടെ ഭണ്ഡാരപാത്രത്തിൽ നിന്നുമൊക്കെയായി എത്രയെത്ര ഇരുപത്തിയഞ്ചുപൈസകളെയാണ് അടിച്ചുമാറ്റിയിട്ടുള്ളത്. സ്കൂൾകാലത്തിന്റെ അവസാനത്തിൽ അധികപങ്കും യാത്ര ചെയ്തത് നിന്റെ കാരുണ്യം കൊണ്ടു മാത്രമായിരുന്നു. കാലമാറിയപ്പോൾ നിനക്കുള്ള വില ആളുകൾ തരാതായി. വഴിയിൽ വീണുകിടക്കുന്നതു കണ്ടാൽ ആരും നിന്നെ എടുക്കാതെയായി. ഭിക്ഷാടനം നടത്തി ഉപജീവനം നടത്തുന്നവർ പോലും നിന്നെ പുച്ഛഭാവത്തിൽ തള്ളിക്കളഞ്ഞു. ഇന്നിപ്പോൾ നിന്നെ അടിച്ചിറക്കാൻ നീ പ്രതിനിധാനം ചെയ്യുന്ന മൂല്യത്തേക്കാൾ പണം ആവശ്യമാണത്രേ!! പൈസയുടെ വിലയേക്കാൾ അതുണ്ടാക്കാനുള്ള ലോഹത്തിനു വിലയേറിയത്രേ… (4 ഇരുപത്തിയഞ്ചുപൈസ തൂക്കിവിറ്റാൽ 10 രൂപ കിട്ടുമായിരുന്നു!! ) എന്നിട്ടുപോലും അവഗണനമാത്രമല്ലേ നിനക്കു മിച്ചം 🙁 എങ്കിലും സകല അവഗണനകളും സഹിച്ച് നീ ഇത്രയും കാലം ഞങ്ങളെ സേവിച്ചു…
ഇടയ്ക്കെന്നോ സ്വർണവർണമാർന്ന് നീ വന്നപ്പോൾ കൗതുകമായിരുന്നു, മിഠായി പോലും വാങ്ങിക്കാതെ അന്നതു സൂക്ഷിച്ചുവെച്ചത് ഇന്നുമോർക്കുന്നു. ഓർമ്മപ്പെരുക്കങ്ങളിൽ നീ എന്നുമുണ്ടാവും. 1835 – ഇൽ വില്യം നാലാമന്റെ ഭരണക്കാലത്താണു 1/4 രൂപ വെള്ളിനാണയം ആദ്യമായി പുറത്തിറക്കിയത്. എങ്കിലും ഇരുപത്തിയഞ്ചുപൈസ എന്ന പദവികിട്ടാൻ 1957-60 കാലം വരെ കാത്തിരിക്കേണ്ടിവന്നു. കോപ്പറും- നിക്കലും ഒക്കെ കൂട്ടിക്കലർത്തിയായിരുന്നു ആദ്യം നിന്റെ രൂപം വാർത്തെടുത്തത്. പിന്നീടത് നല്ല പത്തരമാറ്റുള്ള സ്റ്റെയിന്ലസ് സ്റ്റീലിലേക്കു മാറ്റി. ഒരു കാണ്ടാമൃഗത്തിന്റെ മുദ്രയോടെ സുന്ദരിയും പ്രൗഢഗംഭീരയുമായിട്ടാണു നിന്നെ അവസാനമയി കണ്ടതെന്നോർക്കുന്നു.
നീ പ്രതിനിധാനം ചെയ്യുന്ന മൂല്യത്തേക്കാൾ നിന്റെ ശരീരത്തിനു മൂല്യമേറിയത് പല വിടന്മാരേയും നിന്നിലേക്ക് ആകർഷിപ്പിച്ചിരുന്നു. ആരാധാനാലയങ്ങളിലെ ഗുണ്ഡികകളിൽ നിന്നും നിന്നെ ശേഖരിച്ച് തൂക്കിവിറ്റവർ പണക്കാരായി. LTT പോലുള്ള ചീത്ത സംഘടനകൾ വെടിയുണ്ടയുണ്ടാക്കാൻ വേണ്ടി നിന്റെ ശരീരം ഉരുക്കിവാർത്തിരുന്നത് ഒരു പഴംകഥ! ഇപ്പോൾ നിന്റെ ചേട്ടൻ അമ്പതുപൈസയും ഈ പ്രശ്നങ്ങളൊക്കെ നേരിടുന്നുണ്ട്. ഒരു പക്ഷേ സമീപഭാവിയിൽ നിനക്കുകൂട്ടായി ചേട്ടനും എത്തുമായിരിക്കും.
ബാല്യത്തിന്റെ ഓര്മ്മകളുണര്ത്തുന്ന പ്രിയ നാണയമേ നിനക്കെന്റെ യാത്രാമംഗളങ്ങൾ!!
New Markup Elements for HTML5
New Markup Elements
New elements for better structure:
| Tag | Description |
|---|---|
| For external content, like text from a news-article, blog, forum, or any other content from an external source |
|
| For content aside from the content it is placed in. The aside content should be related to the surrounding content |
|
| A button, or a radiobutton, or a checkbox | |
|
|
For describing details about a document, or parts of a document |
|
|
A caption, or summary, inside the details element |
|
|
For grouping a section of stand-alone content, could be a video |
| The caption of the figure section | |
| For a footer of a document or section, could include the name of the author, the date of the document, contact information, or copyright information |
|
|
|
For an introduction of a document or section, could include navigation |
For a section of headings, using
to
heading of the section, and the others are sub-headings |
|
| For text that should be highlighted | |
| For a measurement, used only if the maximum and minimum values are known | |
| For a section of navigation | |
| The state of a work in progress | |
| For ruby annotation (Chinese notes or characters) | |
| For explanation of the ruby annotation | |
| What to show browsers that do not support the ruby element | |
| For a section in a document. Such as chapters, headers, footers, or any other sections of the document |
|
| For defining a time or a date, or both | |
| Word break. For defining a line-break opportunity. |
New Media Elements
HTML5 provides a new standard for media content:
| Tag | Description |
|---|---|
| For multimedia content, sounds, music or other audio streams | |
| For video content, such as a movie clip or other video streams | |
| For media resources for media elements, defined inside video or audio elements |
|
| For embedded content, such as a plug-in |
The Canvas Element
The canvas element uses JavaScript to make drawings on a web page.
| Tag | Description |
|---|---|
| For making graphics with a script |
New Form Elements
HTML5 offers more form elements, with more functionality:
| Tag | Description |
|---|---|
| A list of options for input values | |
| Generate keys to authenticate users | |
| For different types of output, such as output written by a script |
New Input Type Attribute Values
Also, the input element’s type attribute has many new values, for
better input control before sending it to the server:
| Type | Description |
|---|---|
| tel | The input value is of type telephone number |
| search | The input field is a search field |
| url | The input value is a URL |
| The input value is one or more email addresses | |
| datetime | The input value is a date and/or time |
| date | The input value is a date |
| month | The input value is a month |
| week | The input value is a week |
| time | The input value is of type time |
| datetime-local | The input value is a local date/time |
| number | The input value is a number |
| range | The input value is a number in a given range |
| color | The input value is a hexadecimal color, like #FF8800 |
മലയാളം വിക്കിപീഡിയ പ്രവർത്തകർ കണ്ണൂരിൽ ഒന്നിക്കുന്നു…
മലയാളം വിക്കി പ്രവർത്തകരുടെ നാലാമത് സംഗമം ഈ വരുന്ന ജൂൺ 11-നു് കണ്ണുർ കാൽടെക്സിലുള്ള ജില്ലാ ലൈബ്രറി കൗൺസിൽ ഹാളിൽ വെച്ച് നടക്കുന്ന വിവരം എല്ലാവരും ഇതിനകം അറിഞ്ഞിട്ടുണ്ടാകുമെന്നു കരുതുന്നു. ഈ വർഷത്തെ പരിപാടിയുടെ ഏറ്റവും വലിയ പ്രത്യേകത മലയാളം വിക്കിമീഡിയരോടൊപ്പം വിക്കിമീഡിയ ഫൗണ്ടേഷന്റെ പ്രതിനിധികളായി ടോണി റീഡ്, ബിശാഖ ദത്ത, ഹിഷാം മുണ്ടോൽ എന്നിവർ പങ്കെടുക്കുന്നു എന്നുള്ളതാണ്.
ഈ പരിപാടിയിൽ പങ്കെടുക്കാൻ താല്പര്യമുള്ളവർ വിക്കിപീഡിയയിലെ നാലാം വിക്കി സംഗമം എന്ന താളിലെ പങ്കെടുക്കാൻ താല്പര്യം അറിയിച്ചവർ എന്ന ഭാഗത്ത് തങ്ങളുടെ പേർ ചേർക്കാൻ താല്പര്യപ്പെടുന്നു.
പേരു ചേർക്കാൻ വിക്കിയിൽ ലോഗിൻ ചെയ്ത ശേഷം മുകളിലെ ലിങ്കിൽ ക്ലിക്ക് ചെയ്തിട്ട്
# ~~~ എന്നു മാത്രം നൽകിയാൽ മതി. വിക്കിപ്രവർത്തനങ്ങളിൽ താല്പര്യമുള്ള എല്ലാവരേയും സ്വാഗതം ചെയ്യുന്നു. അതോടൊപ്പം ഈ വിവരം പരമാവധി ആളുകളിലേക്ക് എത്തിക്കണമെന്നും അഭ്യർത്ഥിക്കുന്നു..
എത്തിച്ചേരാൻ
കണ്ണൂർ റെയിൽവേ സ്റ്റേഷനിൽ നിന്നും ഒരു ഓട്ടോ പിടിച്ച് വന്നാൽ മതിയാവും. ഇവിടെ കൊടുത്തിരിക്കുന്ന ലിങ്ക് നോക്കുക, http://goo.gl/maps/JkGC . ഇതിൽ നിന്നും കാൽടെക്സ് ജംങ്ഷൻ അറിയാത്ത, കണ്ണൂരിൽ ഇതിനു മുമ്പ് വന്നിട്ടുള്ളവർക്ക് സ്ഥലത്തിനെ കുറിച്ച് ഏകദേശ ധാരണ കിട്ടും.
കൂടുതൽ വിവരങ്ങൾക്ക് ഈ ലിങ്കിൽ ക്ലിക്ക് ചെയ്യുക.
http://defn.me/r/ml/371y
ഫെയ്സ്ബുക്കിലെ പരസ്യങ്ങൾ കളയാനും തീം മാറ്റാനും ഒരു എളുപ്പ വഴി!
ഫെയ്സ് ബുക്കിലെ വലതുവശം മിക്കപ്പോഴും പലതരത്തിലുള്ള പരസ്യങ്ങള് വന്നു മിന്നിമറയുന്നത് കാണാറില്ലേ. ചിലപ്പോഴെങ്കിലും നിങ്ങളതിനെ എങ്ങനെ ഒഴിവാക്കാം എന്നതിനെ പറ്റി ചിന്തിച്ചിട്ടുണ്ടാവും. പലപ്പോഴും അത്തരം പരസ്യങ്ങളില് ക്ലിക്ക് ചെയ്ത് നെറ്റില് കറങ്ങിനടന്നിട്ടുമുണ്ടാവും. ഇവിടെ, ഫെയ്സ്ബുക്കിനു വേണ്ടിയുള്ള ചെറിയൊരു എക്സ്റ്റന്ഷന് കൊടുത്തിരിക്കുന്നു. കൊടുത്തിരിക്കുന്ന കാര്യങ്ങള് അതുപടി ചെയ്താന് അത്തരം പരസ്യങ്ങളെ ഒഴിവാക്കി ഫെയ്സ്ബുക്ക് അപ്ഡേറ്റുകള് കൂടുതല് വീതിയുള്ള പ്രതലത്തില് കാണാവുന്നതാണ്. അതിന്റെ കൂടെ, ഫെയ്സ്ബുക്കിന്റെ കളര് തീമിലും ചെറിയ മാറ്റം വരുത്തിയിട്ടുണ്ട്. ഫയര്ഫോക്സ് മോസില്ലയില് മാത്രമേ ഇതു വര്ക്ക് ചെയ്യുകയുള്ളൂ… മോസില്ലയല്ല ഉപയോഗിക്കുന്നത് എങ്കില് താങ്കള് ഇനി താഴോട്ട് വായിക്കണമെന്നില്ല
🙂
മാറ്റങ്ങള് വരുത്തുന്നതിനു മുമ്പ്, ജാക്സന് ഡവലപ്പ് ചെയ്ത സ്റ്റൈലിഷ് എന്ന മോസില്ല ബ്രൗസര് ആഡോണ് ഇന്സ്റ്റാള് ചെയ്യേണ്ടതാണ്. അതിനായി ഇവിടെ ക്ലിക്ക് ചെയ്യുക. ഇതു വളരെ ലൈറ്റ്-വെയ്റ്റാണ്, അധികം മെമ്മറിയൊന്നും കളയുമെന്ന പേടി വേണ്ട. ഈ ആഡോണ് ഇന്സ്റ്റാള് ചെയ്താല് പ്രത്യേകിച്ച് ഒന്നും കിട്ടില്ല; മറ്റുസൈറ്റുകളെ നമ്മുക്ക് ഇഷ്ടപ്പെട്ട രീതിയില് സ്റ്റൈല് ചെയ്തെടുക്കാനുള്ള ഒരു ഇന്റെര്ഫേസാണ്. അവിടെ, സ്റ്റൈല് ഷീറ്റിനെ കുറിച്ച് അറിയാവുന്നവര്ക്ക് മാറ്റങ്ങള് വരുത്താവുന്നതാണ്. ഈ അഡ്ഓണ് ഇന്സ്റ്റാള് ചെയ്യാന്വേണ്ടി ആ സൈറ്റില് കാണുന്ന Add to Firefox എന്ന ബട്ടന് ക്ലിക്ക് ചെയ്താല് മതി. അപ്പോള് തുറന്നു വരുന്ന വിന്ഡോയില് ഇത് ഇന്സ്റ്റാള് ചെയ്യാനുള്ള ഓപ്ഷന് കാണും.
സ്റ്റൈലിഷ് എന്ന ആഡോണ് ഇന്സ്റ്റാള് ചെയ്തു കഴിഞ്ഞാല് ബ്രൗസര് ഒന്നു ക്ലോസ് ചെയ്തിട്ട് വീണ്ടും ഓപ്പണ് ചെയ്യുക. സ്റ്റൈലിഷ് എന്ന എക്സ്റ്റന്ഷന്റെ ഉപയോഗം മുകളില് പറഞ്ഞല്ലോ. ഇതുവെച്ചാണിനി നമ്മുടെ കളികള്.
ഇനി Ctrl + Shift + A ഒന്നിച്ചു പ്രസ്സ് ചെയ്യുക. (ആഡോണ് ഇന്സ്റ്റാള് ചെയ്തു പരിചയമില്ലാത്തവര്ക്ക് അതെവിടെ കിടകുന്നു എന്നു കണ്ടെത്താന് ബുദ്ധിമുട്ടുകാണുമായിരിക്കും. മോസില്ലയുടെ മെനുബാറില് (Alt + T) ടൂള്സ് എന്ന മെനു ഐറ്റം ഉണ്ട്. അതില് Add – Ons എന്ന മെനുഐറ്റം ക്ലിക്ക് ചെയ്താലും മതിയാവും)
അപ്പോള് ആഡോണ് വിന്ഡോ തുറന്നുവരും.
ആ വിന്ഡോയില് തപ്പിനോക്കിയാള് എക്സ്റ്റന്ഷന്സ് (Extensions) എന്നൊരു ടാബ് കാണും. അതു ക്ലിക്ക് ചെയ്യുക. അതില് നിങ്ങള് ഇതുവരെ ഏതെങ്കിലും ബ്രൗസര് എക്സ്റ്റന്ഷന്സ് ഇന്സ്റ്റാള് ചെയ്തിട്ടുണ്ടെങ്കില് അവയൊക്കെ കാണാവുന്നതാണ്. നമ്മള് ഇപ്പോള് ഇന്സ്റ്റാള് ചെയ്ത സ്റ്റൈലിഷ് എന്ന എക്സ്റ്റന്ഷനും അവിടെ കാണും!
Options, Disable, Remove എന്നിങ്ങനെ മൂന്നു ബട്ടണുകള് അവിടെ തന്നെ കാണാനാവും. അതില് ഓപ്ഷന്സ് എന്ന ബട്ടനിലാണു നമ്മുടെ കളികള്!
ഡിസേബിള് എന്ന ബട്ടന് സ്റ്റൈലിഷ് എന്ന എക്സ്റ്റന്ഷന്റെ പരിപാടി നിങ്ങള്ക്ക് ഇഷ്ടപ്പെട്ടില്ലെങ്കില് നിര്ത്തിവെക്കാനുള്ളതാണ്. മുഴുവനായും ഒഴിവാക്കാനുള്ളതാണ് റിമൂവ് ബട്ടന്.
Options എന്ന ബട്ടന് ക്ലിക്ക് ചെയ്യുക. അതു ക്ലിക്ക് ചെയ്യുമ്പോള് വേറൊരു വിന്ഡോ തുറന്നുവരും; ഒന്നും കാണില്ല അതില്! അതിന്റെ താഴെ, Write New Style എന്ന ഒരു ബട്ടന് കാണാം. അതു ക്ലിക്ക് ചെയ്തിട്ടുവേണം നമുക്ക് പുതിയ സ്റ്റൈല്സ് എഴുതാന്. ഇപ്പോള് വരുന്ന വിന്ഡോ ഒന്നു നോക്കുക. അതില് മൂന്ന് ടെക്സ്റ്റ് ബോക്സുകള് കാണാം. ഇവിടെ കൊടുത്തിരിക്കുന്ന ചിത്രത്തില് കാണുതു പോലെ അതില് ഫില് ചെയ്യുക:
Name: MyFBStyle
Tags: facebokstyle
ഇതിനു താഴെ കാണുന്ന വലിയ ടെക്സ്റ്റ് ബോക്സില്
@import url(“https://chayilyam.com/stories/MyWorks/facebookStyles.css”);
ഇതു കോപ്പിയെടുത്തു പേസ്റ്റ് ചെയ്യുക. Name -ഉം Tags – ഉം നിങ്ങള്ക്കിഷ്ടമുള്ളതു കൊടുക്കാം. പക്ഷേ, ഈ സി എസ് എസ് കോഡ് ഇതേ പടിതന്നെ കൊടുക്കണം. ഇനി നിങ്ങള് ഫെസ്സ് ബുക്ക് ഒന്ന് ഓപ്പണ് ചെയ്തു നോക്കൂ 🙂
- പരസ്യങ്ങള് ഒക്കെ അപ്രത്യക്ഷമായി
- ഫെയ്സ്ബുക്ക് അപ്ഡേറ്റ്സും നോട്ടിഫിക്കേഷനും വരുന്നഭാഗം കൂടുതല് വീതിയുള്ളതും വൃത്തിയുള്ളതും ആയി
- ലേഔട്ടിലെ കളറുകളൊക്കെ കുറച്ച് മാറി, ബാക്ഗ്രൗണ്ടില് ഗ്രേഡിയന്റ് കളര് വന്നു
- നിങ്ങളുടെ ഫെയ്സ്ബുക്കിനൊരു ക്ലീന് ലുക്ക് കിട്ടുന്നു
ഫെയ്സ് ബുക്ക് ആഡോണ് ഇഷ്ടപ്പെട്ടില്ലെങ്കില്
ഇനിയിതു വേണ്ടാ എന്നുണ്ടെങ്കില് കളയാന് വളരെ എളുപ്പമാണ് Ctrl + Shift + A മോസില്ലയുടെ ആഡോണ് വിന്ഡോ ഓപ്പണ് ചെയ്യുക. എന്നിട്ട് അതില് നിന്നും സ്റ്റൈലിഷ് എന്ന എക്സ്റ്റന്ഷന് കണ്ടെത്തി അതിലെ രണ്ടാമത്തെ ബട്ടണ് ആയ Disable ക്ലിക്ക് ചെയ്താല് മതിയാവും. ഫെയ്സ്ബുക്ക് പഴയപടി ആയിട്ടുണ്ടാവും.
ഇതിനുവേണ്ടി തയ്യാറാക്കിയ CSS കോഡ് ആര്ക്കെങ്കിലും വേണമെന്നുണ്ടെങ്കില് ഇവിടെ നിന്നും കോപ്പി ചെയ്തെടുക്കാവുന്നതാണ്…
ഇതു വളരെ എളുപ്പത്തില് ഒരു നോട്ട്പാഡില് ഓപ്പണ് ചെയ്തിട്ട് എഡിറ്റ് ചെയ്യാവുന്നതും ആണ്. സി.എസ്.എസ്. അറിയുന്നവര് മാത്രം ആ പണിക്കു പോയാല് മതിയാവും.
ഇതു ചെയ്തു കഴിഞ്ഞാല് ഫെയ്സ്ബുക്ക് എങ്ങനെയിരിക്കും എന്നു കാണാന് ഈ ലിങ്കു നോക്കുക
ഒരു പെണ്ണുകാണല് ചടങ്ങിന്റെ ഓർമ്മയ്ക്ക്!
കുറേയേറെയായി ആള്ക്കാര് അവിടെ നിന്നും ഇവിടെ നിന്നുമൊക്കെ തോണ്ടാന് തുടങ്ങിയിട്ട്! എന്താ പെണ്ണുകെട്ടാന് പ്ലാനില്ലേ? ഇങ്ങനെ നടന്നാല് മതിയോ! ഒരു കുടുംബവും പ്രാരാബ്ധവുമൊക്കെ വേണ്ടേ … ചോദ്യങ്ങള് കേട്ടു മടുത്തു. പെണ്ണുകെട്ടാതെ ജീവിക്കുന്നത് ഏതാണ്ട് അപരാധം പോലെ!! ഇവിടെ ബാംഗ്ലൂരില് പലരോടും പ്രേമത്തിലാണെന്ന അഭ്യൂഹം മറ്റൊരു വശത്ത്; നാട്ടില് പോയാല് നാട്ടുകാരും പറയുന്നത് ഇതൊക്കെ തന്നെ… അവർക്ക് സങ്കല്പങ്ങളേറെയാണ് – ‘ബാംഗ്ലൂരല്ലേ!! കുടുംബം മാതിരി തന്നെയാവും ജീവിതം അല്ലേ!’ ഇവിടെ പ്രേമിച്ച് ഉന്മത്തരായി ജീവിതം ആസ്വദിക്കാന് വരുന്നതാണെന്ന വിശ്വാസമോ എന്തോ…
കുറച്ചുനാള് ലീവെടുത്ത് വീട്ടില് പോയി വന്നാല് കൂട്ടുകാരുടെ ചോദ്യവും മറ്റൊന്നല്ല; പെണ്ണുകണ്ടില്ലേ എന്ന്!! ഇതൊക്കെ കേട്ടുകേട്ടാവണം, ഞാന്പോലുമറിയാതെ പെണ്ണുകാണല് എന്ന ചടങ്ങ് എന്റെ മനസ്സില് മെല്ലെ ഉരുവം കൊണ്ടു. സമൂഹത്തിന്റെ അടിസ്ഥാന യൂണിറ്റ് എന്ന് വിശേഷിപ്പിക്കപ്പെടുന്ന കുടുംബം എന്ന സ്ഥാപനത്തിന്റെ രൂപീകരണവുമായ് നന്നേ ബന്ധപ്പെട്ടു കിടക്കുന്ന പെണ്ണു കാണല് ചടങ്ങിന്റെ ദൃശ്യം ഉള്ളില് ഇടയ്ക്കൊക്കെ തെളിഞ്ഞു വരാന് തുടങ്ങി. സുന്ദരിയും സുശീലയുമായ ഒരു പെണ്ണ് നാണം കുണുങ്ങിയായി വന്ന്, വാതില്പ്പടി ചാരി ഇടയ്ക്കൊക്കെ എന്നെ എത്തിനോക്കി തുടങ്ങി; ചായയുമായി മന്ദം മന്ദം വന്ന് ഏഴുതിരിയിട്ട നിലവിളക്കുപോലെ അവള് എന്റെ മുന്നില് ജ്വലിച്ചുയര്ന്നു. അവ്യക്തമെങ്കിലും ആ മുഖം എന്നെ അലോസരപ്പെടുത്താന് തുടങ്ങി – ഉടനെ അതിനൊരു മൂര്ത്തരൂപം നല്കി പ്രതിഷ്ഠ നടത്തണം.
ഷെറിന്. പഴയകൂട്ടുകാരിയാണ്. ഒന്നിച്ചു പഠിച്ചവള്. ടൗണിലൊരു ഹോസ്പിറ്റലില് അവള് ജോലി ചെയ്യുന്നു. ഒരിക്കല് ബാങ്കില് പോയി വരുന്ന വഴിക്ക് അവളുടെ ഹോസ്പിറ്റലിനു മുന്നിലൂടെ വന്നപ്പോള് ഒന്നു വിളിച്ചേക്കാമെന്നു കരുതി.
“എടാ, ഇങ്ങോട്ടു വാടാ – കുറേ ആയില്ലേ കണ്ടിട്ട്, ഞാനിപ്പോള് ഫ്രീയാണ്. നീ ഇങ്ങോട്ട് വാ”
ഞാന് കേറി ചെല്ലുമ്പോള് അവളും അവളുടെ മൂന്നു കൂട്ടുകാരികളും അവിടെ ഉണ്ട്. പലതും പറഞ്ഞ് ഞങ്ങള് ഒരു ചായ കുടിച്ചേക്കാം എന്നു കരുതി പുറത്തിറങ്ങി. ചായകുടിക്കുമ്പോള് അവളും ചോദിച്ചു പെണ്ണുകെട്ടാന് പ്ലാനില്ലേ എന്ന്.
“പെണ്ണിനെയൊന്നും കിട്ടാനില്ലല്ലോ ഷെറിന്” – ഞാന്
“ഞാന് അന്വേഷിക്കണോ – നിനക്കെത്ര പെണ്ണിനെ വേണം!! സോഫ്റ്റ്വെയർ എഞ്ചിനീയർ എന്നു പറഞ്ഞാൽ പെൺപിള്ളേർ ഓടിവരില്ലേ!! ” – അവള്
“ആഹാ! അതു കൊള്ളാല്ലോ, എങ്കില് ആവട്ടേ” എന്നായി ഞാന്
പിറ്റേന്ന് രാവിലെ ഒരു കോള്, ഷെറിന്റേതാണ്. “എടാ, ഞാന് നിന്റെ കാര്യം ഇവിടെ എന്റെ ഫ്രണ്ട്സിനോട് പറഞ്ഞു, ഇവിടെ ഉള്ള ഒരു ചേച്ചിയുടെ റിലേറ്റീവ് അടുത്തു തന്നെ വര്ക്ക് ചെയ്യുന്നുണ്ട് – നീ വാ നമുക്കു പോയി നോക്കാം” എല്ലാം വളരെ പെട്ടന്നായിരുന്നു.
രാവിലെ കാഞ്ഞങ്ങാട് എത്തി ഷെറിനെ വിളിച്ചപ്പോള് അവൾ പറഞ്ഞു നീ ഇങ്ങോട്ട് വാ. ആദ്യം ഇവിടെ ഒരു സ്ക്രീനിങ് ടെസ്റ്റ് ഉണ്ട്. എന്റെ ഫ്രണ്ട്സിനൊക്കെ നിന്നെ ഒന്നു കാണണം! ഈശ്വരാ – ഞാന് ഒരു കാഴ്ചവസ്തുവാകാന് പോകുന്നു എന്ന ചിന്ത എന്നെ വേട്ടയാടി. ഇതെന്താ ആണുകാണല് പരിപാടി ആണോ. ങാ എന്തും വരട്ടെ – ഒന്നുമില്ലെങ്കില് ഒരാണല്ലേ!! നേരെ വിട്ടു അവളുടെ അടുത്തേക്ക്…
ഷെറിനെ കൂടാതെ അഞ്ചാറു സുന്ദരിമാര് – എല്ലാവരുടേയും മുഖത്ത് പുഞ്ചിരി! നല്ല പരിചിതഭാവം എല്ലാ മുഖത്തും ഉണ്ട്. ഞാന് നോക്കി, ഇതില് ആരാവും അവള്? രണ്ടുപേരുടെ നെറ്റിയില് നോ വേക്കന്സി എന്നറിയിക്കാനെന്നപോലെ സിന്ദൂരമുണ്ട് – അവരെ ഫില്ടര് ചെയ്ത് മാറ്റി ഞാന് വീണ്ടും അവരില് അവളെ തെരഞ്ഞു.
അതിലൊരാളെ ചൂണ്ടിക്കാട്ടിയിട്ട് ഷെറിന് പറഞ്ഞു
“ഈ ചേച്ചിയുടെ ബന്ധുവാണു കുട്ടി. കുട്ടി ഇവിടെയല്ല, അവള് വര്ക്കുചെയ്യുന്ന സ്ഥലം വേറെയാണ് – വാ നമുക്ക് അങ്ങോട്ടു പോകാം.”
ചേച്ചി സുന്ദരിയാണ്. എനിക്കിഷ്ടപ്പെട്ടു. ചേച്ചിയുടെ ബന്ധുവും ഇതുപോലെയൊക്കെ തന്നെയാവും. ശ്രുതി മധുരമായ ഒരു പേരായിരുന്നു ആ കുട്ടിക്ക്. ഞങ്ങള് രണ്ടുപേരും അവള് വര്ക്ക് ചെയ്യുന്നിടത്തേക്കു നടന്നു. കുറച്ചപ്പുറമുള്ള മറ്റൊരു ഹോസ്പിറ്റലില് ആണവള് വര്ക്കു ചെയ്യുന്നത്. BPharm ഈ അടുത്ത് കഴിഞ്ഞതേ ഉള്ളൂവത്രേ – റിസൽട്ട് വന്നിട്ടില്ല…
“എടാ, ഞാനവളെ കണ്ടിട്ടൊന്നുമില്ലാട്ടോ – അധികം പൊക്കമില്ലാന്നാണു ചേച്ചി പറഞ്ഞത്… എന്തായാലും എന്റെയത്ര സുന്ദരിയാവാന് വഴിയില്ല!!” ഞാനൊരു രൂപം ഓര്ത്തെടുക്കാന് ശ്രമിക്കുകയായിരുന്നു. മനസ്സില് നാണംകുണുങ്ങിയായ പെണ്കുട്ടി വാതില്പ്പടിക്കു ചാരെ വന്നിരുന്നു പുഞ്ചിരിച്ചു. ഓ പൊക്കം അല്പം കുറഞ്ഞാല് എന്താ കുഴപ്പം! പൊക്കത്തിലല്ലല്ലോ പൊരുത്തത്തിലല്ലേ കാര്യം – മനസ്സ് വെറുതേ തത്ത്വബോധം വിളമ്പുന്നു…
എങ്കിലും ഒരു നെഗറ്റീവ് ചിന്ത എങ്ങനെയോ ഉള്ളിൽ കടന്നുകൂടി… എനിക്കവളെ ഇഷ്ടപ്പെട്ടില്ലെങ്കിലോ? എന്തു പറയും? ഷെറിനും അതൊരു ഫീലിംങാവില്ലേ! ആ കുട്ടിയുടെ മനസ്സിലും കാണില്ലേ ഒത്തിരി സങ്കല്പങ്ങള് – അതിനെയൊക്കെ ചവിട്ടിത്തേച്ച് ‘നിന്നെ എനിക്കിഷ്ടപ്പെട്ടില്ല പെണ്ണേ’ എന്നെങ്ങനെ പറയും? മനസ്സാകെ കലുഷിതമായി… ഒരു മുന്കൂര് ജാമ്യമെന്ന പോലെ ഞാന് ഷെറിനോടു പറഞ്ഞു, “എടീ, എനിക്കിഷ്ടപ്പെട്ടതോണ്ടു മാത്രം കാര്യമാവില്ല കേട്ടോ – ജാതകം ചേരണം, ഇല്ലം വേറെവേറെ ആവണം….” ഈ ജാതകത്തിനെയൊക്കെ തെറിപറഞ്ഞു നടന്നതിൽ ഞാൻ ആത്മാർത്ഥമായി ഖേദിച്ചു.
“എടാ ആദ്യം നീ പെണ്ണിനെ കാണ് – എന്നിട്ടുപോരെ അതൊക്കെ”
“മതി മതി – ഞാന് പറഞ്ഞെന്നേ ഉള്ളൂ”
ഞങ്ങൾ അവിടെ എത്തി. എന്നെ അവിടെ ഒരിടത്ത് ഇരുത്തി ഷെറിൻ ഉള്ളിലേക്കു പോയി. അല്പം കഴിഞ്ഞപ്പോൾ അവൾ വന്നു. “കുട്ടിയിപ്പോൾ വരും – ഞാൻ വിളിക്കാൻ പറഞ്ഞിട്ടുണ്ട്” പണ്ടാരം വന്നില്ലേ! അവൾ വാതിൽപ്പടിയിൽ നിന്ന് ഒളിച്ചു കളിക്കുന്നോ! അല്പം കഴിഞ്ഞപ്പോൾ അവൾ വന്നു… 🙁
കണ്ടപ്പോൾ തന്നെ എന്റെ ഉള്ളൊന്നു കാളി!! അയ്യേ! ഇതെന്തു പെണ്ണ്! ബോബുചെയ്ത മുടി അനുസരണയില്ലാതെ പാറി നടക്കുന്നു. മെലിഞ്ഞ് ഒരു കോലുപോലെ. പേരിനു പോലും അവൾക്ക് മുലകൾ ഉള്ളതായി തോന്നിയില്ല… ഇരുണ്ട നിറം. സോഡാക്കുപ്പിക്കണ്ണട വെച്ചിരിക്കുന്നു! ഒരു ഒമ്പതാം ക്ലാസിൽ പഠിക്കുന്ന പഠിപ്പിസ്റ്റും ബുജിയുമായ ഒരു കുട്ടിയെപോലെ തോന്നി. പെണ്ണാണെന്നു മനസ്സിലാക്കിയെടുക്കാൻ തന്നെ അല്പം പാടാണ്. ഞാൻ ദയനീയമായി ഷെറിനെ നോക്കി. അവളും ആദ്യമായി കാണുകയാണ്. സംസാരിച്ചപ്പോൾ പെണ്ണ് വിചാരിച്ചതുപോലെയൊന്നുമല്ല. ശരീരം ഒമ്പതിലാണെങ്കിലും നാക്ക് എം എ ക്കാണു പഠിക്കുന്നത് എന്നു തോന്നി…
എനിക്കൊന്നും ചോദിക്കാനും പറയാനും തോന്നുന്നില്ല. ഷെറിൻ എന്തൊക്കെയോ ചോദിക്കുന്നുണ്ടായിരുന്നു. “അവൾ ചോദിച്ചു നിന്റെ ഇല്ലം ഏതാണ്?”
“എന്റെ അമ്മ കോഴിക്കോട് കാരിയാ, ഞങ്ങൾക്കങ്ങനെ ഇല്ലമൊന്നും ഇല്ല” ഈശ്വരാ അതും പോയി!! ഇനിയുള്ളത് ജാതകം ആണ്. ഞാൻ പറഞ്ഞു, “നാളെ നീ ഷെറിന്റെ കയ്യിൽ ജനനതീയതി കൊടുക്കൂ, ഞാൻ ജാതകപൊരുത്തം നോക്കാം എന്റെ കയ്യിൽ അതിനുള്ള സോഫ്റ്റ്വെയർ ഉണ്ട്”
“എന്നാൽ പിന്നെ ഇപ്പോൾ തന്നെ നോക്കാമല്ലോ” ലാപ്ടോപ്പ് നോക്കി ഷെറിൻ പറഞ്ഞു. ശ്ശെടാ ഇവൾ വിടാൻ ഭാവമില്ലല്ലോ!!
“ഷെറിനേ, ഇതിൽ ചാർജില്ല – നീ നാളെ തന്നാൽ മതി, ബാംഗ്ലൂരെത്തി ഞാൻ വിളിക്കാം”
തിരിച്ചു വരുമ്പോൾ ഷെറിന്റെ വക കമന്റ് – “നീയാകെ ചമ്മിപ്പോയല്ലോടാ – ഇങ്ങനെയാണോ പെണ്ണുകാണാൻ വരിക സ്മാർട്ടാവണം – വാചകമൊക്കെ മാത്രമേ ഉള്ളു അല്ലേ!” ഷെറിൻ വാചാലമാവുകയാ. ഇവൾക്കവളെ ഇഷ്ടപ്പെട്ടോ? ഞാനെന്തു പറയും ഇവളോട്! ഹോ! പണ്ടാരം വേണ്ടായിരുന്നു… വാതിൽപ്പടിക്കപ്പുറം ഇപ്പോൾ ശൂന്യമാണ് – ആ സുന്ദരിയുടെ പൊടിപോലുമില്ല!!
“എടാ ഇക്കാലത്താരാണ് ജാതകമൊക്കെ നോക്കുന്നത്? അതൊക്കെ ഞങ്ങളെ ക്രിസ്ത്യാനികളെ കണ്ടു പഠിക്ക്…” ഷെറിൻ കത്തിക്കേറുകയാണ്… ഇന്നലെ വരെ ജാതകത്തെക്കുറിച്ച് ഞാനും ഇതൊക്കെ തന്നെയാണു ഷെറിനേ പറഞ്ഞു നടന്നത്…! അതിന്റെയൊക്കെ ആവശ്യം ഇപ്പോഴല്ലേ മനസ്സിലാവുന്നത്!
ബാംഗ്ലൂരെത്തി. ഒരു ഒമ്പതുമണിയായപ്പോൾ ഞാൻ ഷെറിനെ വിളിച്ചു – “എടീ അവൾ ജനനതീയതിയും മറ്റു ഡീറ്റൈൽസും തന്നോ?”
“എടാ നമുക്കതു വേണ്ടടാ – അവൾക്ക് നിന്നെ ഇഷ്ടപ്പെട്ടില്ലെന്ന്, നീ വിഷമിക്കുകയൊന്നും വേണ്ട കേട്ടോ നമുക്കു വേറെ നോക്കാം…”!!!
എനിക്കുറക്കെ ചിരിക്കണമെന്നു തോന്നി! ഞാൻ വളരെയേറെ സങ്കടം വരുത്തി ചോദിച്ചു, “എന്താടി അവൾ കാര്യം പറഞ്ഞോ?”
“ഇല്ലെടാ, ഞാൻ കൂടുതലൊന്നും ചോദിച്ചില്ല, എന്തിനാ വെറുതേ, എനിക്കും വിഷമമാവും നിനക്കും വിഷമമാവും – അതു വിട്ടേക്ക് – അഹങ്കാരമല്ലാതെ വേറെന്തു പറയാൻ”
നമുക്കു വേണോ ഇങ്ങനെയൊരു രാഷ്ട്രീയം?
കാസർഗോഡടക്കം മറ്റുള്ള പല സ്ഥലങ്ങളിലും ബിജെപി കയറിവരാൻ പ്രധാന കാരണം കോൺഗ്രസാണ്; അല്ലെങ്കിൽ കോൺഗ്രസിന് ലീഗുപോലുള്ള വർഗീയപാർട്ടികളോടുള്ള അമിത സ്നേഹമാണ്. ഹിന്ദുക്കളുടെ ഇടയിൽ വൻതോതിലുള്ള വർഗീയ ധ്രുവീകരണത്തിന് ഇതു കാരണമാവുന്നു. ബിജെപി അതു നന്നായി ചൂഷണം ചെയ്യുകയും ചെയ്യുന്നു. ഹിന്ദുക്കളുടെ വര്ഗീയമായ ധ്രുവീകരണം മുസ്ലീങ്ങളുടെ വര്ഗീയ ശക്തിപ്പെടലിനു തിരിച്ചും കാരണമാവുന്നു. കേരളാ കോണ്ഗ്രസുകളുടെ കാര്യത്തിലും സംഭവിക്കുന്നത് ഇതു തന്നെയാണ്. ക്രിസ്ത്യാനികളുടേയും നായന്മാരുടേയും ശക്തമായ ഏകീകരണം കോണ്ഗ്രസിന്റെ ഈ വൃത്തികെട്ട അധികാര ദുര്മോഹം വഴി ശക്തമാവുന്നു. വോട്ടുവാങ്ങി ജയിച്ചുകേറുന്ന ഇത്തരം വെറുക്കപ്പെട്ട ജന്മങ്ങള് സുപ്രധാനവകുപ്പുകള് വിലപേശിവാങ്ങിച്ച് അധികാരദുര്വിനിയോഗം നടത്തുന്നതും പലതവണ നമ്മള് കണ്ടു കഴിഞ്ഞു. ജാതിമതങ്ങള്ക്കതീതമായി ചിന്തിക്കാന് ഇന്നത്തെ തലമുറയെ പഠിപ്പിക്കേണ്ടവര് അത്തരം വികാരങ്ങളെ കുത്തിയും തോണ്ടിയും വ്രണപ്പെടുത്തി വോട്ടാക്കി വാങ്ങിക്കുന്നു. അധമവികാരങ്ങളായി അവ മനസ്സില് അടിഞ്ഞ് തമ്മില് തമ്മില് കലഹിച്ചു മരിക്കുന്ന ഒരു നാളെ നമുക്കു വിദൂരമല്ല.
മതത്തിന്റേയോ ജാതിയുടേയോ പേരിലുള്ള ഏകീകരണം മൂലം ഒരു കാലത്തു നമ്മള് നന്നാവാന് പോകുന്നില്ല. പരസ്പര വിദ്വേഷത്തിനും, ചൂഷണങ്ങള്ക്കും അല്ലാതെ ഇവകൊണ്ട് ഇക്കാലത്ത് നേട്ടങ്ങളൊന്നും തന്നെയില്ല. ഒന്നും വേണ്ട എന്നു പറയുന്നില്ല. എല്ലാം ആയിക്കോട്ടെ; മുമ്പും ഇതൊക്കെ ഉണ്ടായിരുന്നതാണല്ലോ. പക്ഷേ, ജാതിയേയും മതത്തെയും രാഷ്ട്രിയത്തില് നിന്നും മുക്തമാക്കുക തന്നെ വേണം. രാഷ്ട്രീയമായി ഒരു മതവും ഏകീകരിക്കരുത്. രാഷ്ട്രീയ ലക്ഷ്യങ്ങള്ക്ക് മതത്തെയോ ജാതിയേയോ കരുവാക്കുകയും അരുത്. ദൗര്ഭാഗ്യകരമെന്നുതന്നെ പറയാം അധികാരം നോട്ടംവെച്ച് കോണ്ഗ്രസ് നടത്തുന്ന പൊറാട്ടുനാടകം കേരളത്തില് ദൂരവ്യാപകമായ പല ദൂഷ്യങ്ങല്ക്കും സാക്ഷ്യം വഹിക്കും. ഈ പോക്കുപോയാല് ഒരു കാലത്ത് കോണ്ഗ്രസ് എന്ന പാര്ട്ടി തന്നെ ഇതിനുവേണ്ടി ബലിയാടാവുമെന്നു തോന്നുന്നു.
തിരുവനന്തപുരത്തും കാസര്ഗോഡും ബിജെപിയുടെ വളര്ച്ചയും എല്ഡിഫിന് ഇപ്രാവശ്യം പ്രവചിച്ചതുപോലുള്ള തോല്വി ലഭിക്കാതിരുന്നതിനും ഒരു മുഖ്യകാരണം കോണ്ഗ്രസിന്റെ വര്ഗീയകൂട്ടായ്മയോടുള്ള ജനങ്ങളുടെ അനഭിമതം തന്നെയാണ്. സമീപഭാവിയില് ഈ അവിശുദ്ധ കൂട്ടുകെട്ടിന് കോണ്ഗ്രസും കേരളവും വലിയ വില നല്കേണ്ടിവരും.
പറയുവാനാകാത്തൊരായിരം കദനങ്ങള്
കവിത കേൾക്കുക
[ca_audio url=”https://chayilyam.com/stories/poem/parayuvan.mp3″ width=”300″ height=”27″ css_class=”codeart-google-mp3-player” autoplay=”false”]
പറയുവാനാകാത്തൊരായിരം കദനങ്ങള്
ഹൃദയത്തില് മുട്ടി വിളിച്ചിടുമ്പോള്
പറയുവാനാകാത്തൊരായിരം കദനങ്ങള്
ഹൃദയത്തില് മുട്ടി വിളിച്ചിടുമ്പോള്
ഇനിയെനിക്കിവിടിരുന്നൊറ്റക്കു പാടുവാന്
കഴിയുമോ രാക്കിളി കൂട്ടുകാരീ…
ഇനിയെന് കരള്ക്കൂട്ടില് നിനവിന്റെ കുയില്മുട്ട
അടപൊട്ടി വിരിയുമോ പാട്ടുകാരീ
ഇനിയെന്റെ ഓര്മകളില് നിറമുള്ള പാട്ടുകള്
മണിവീണ മൂളുമോ കൂട്ടുകാരീ…
നഷ്ടമോഹങ്ങള്ക്കു മേലടയിരിക്കുന്ന
പക്ഷിയാണിന്നു ഞാന് കൂട്ടുകാരി
ഇഷ്ടമോഹങ്ങള്ക്കു വര്ണരാഗം ചേര്ത്തു
പട്ടു നെയ്യുന്നു നീ പാട്ടുകാരീ
നഷ്ടമോഹങ്ങള്ക്കു മേലടയിരിക്കുന്ന
പക്ഷിയാണിന്നു ഞാന് കൂട്ടുകാരീ…
നിറമുള്ള ജീവിത സ്പന്ദനങ്ങള്
തല ചായ്ച്ചുറങ്ങാന് ഒരുക്കമായി
ഹിമബിന്ദു ഇലയില്നിന്നൂര്ന്നുവീഴും പോലെ
സുഭഗം, ക്ഷണികം, ഇതു ജീവിതം
വീണ്ടുമൊരു സന്ധ്യ മായുന്നു
വിഷാദാദ്ര രാഗമായ് കടലു തേങ്ങിടുന്നു
ആരോ വിരല്തുമ്പു കൊണ്ടെന്റെ തീരത്തു
മായാത്ത ചിത്രം വരച്ചിടുന്നു
തിരയെത്ര വന്നുപോയെങ്കിലും തീരത്തു
വരയൊന്നു മാഞ്ഞതെയില്ലിത്രനാല്
ഇനിയെനിക്കിവിടിരുന്നൊറ്റക്കു തിരകളെ
തഴുകുവാന് കഴിയുമോ കൂട്ടുകാരീ…
പറയാന് മറന്നോരു വാക്കു പോല് ജീവിതം
പ്രിയമുള്ള നൊമ്പരം ചേര്ത്തു വച്ചു
ഒപ്പം നടക്കുവാന് ആകാശ വീഥിയില്
ദുഖചന്ദ്രക്കല ബാക്കിയായി
ഇനിയെനിക്കിവിടിരുന്നൊറ്റക്കുറങ്ങുവാന്
മൌനരാഗം തരൂ കൂട്ടുകാരീ…
വിടവുള്ള ജനലിലൂടാദ്രമായ് പുലരിയില്
ഒരു തുണ്ട് വെട്ടം കടന്നു വന്നു
ഓര്മ്മപ്പെടുത്തലായപ്പോഴും ദുഃഖങ്ങള്
ജാലകപ്പടിയില് പതുങ്ങി നിന്നു
ഇനിയെനിക്കിവിടിരുന്നൊറ്റക്കു തിരകളെ
തഴുകുവാന് കഴിയുമോ കൂട്ടുകാരീ…
കൂട്ടിക്കുറച്ചു ഗുണിക്കുംപോഴൊക്കെയും
തെറ്റുന്നു ജീവിത പുസ്തകതാള്
കാണാക്കനക്കിന് കളങ്ങളില് കണ്ണുനീര്
പേനത്തലപ്പില് നിന്നൂര്ന്നുവീണൂ…
ദുഖിക്കുവാന് വേണ്ടിമാത്രമാണെങ്കിലീ
നിര്ബന്ധ ജീവിതം ആര്ക്കു വേണ്ടീ…
പ്രിയമുള്ള രാക്കിളീ…;
പ്രിയമുള്ള രാക്കിളീ
നീ നിന്റെ പാട്ടിലെ ചോദ്യം, വിഷാദം പൊതിഞ്ഞു തന്നു
ഒറ്റക്കിരിക്കുംപോലോക്കെയും കണ്ണുനീരൊപ്പമാ
പാഥേയം ഉണ്ണുന്നു ഞാന്…
ഇനിയെനിക്കിവിടിരുന്നൊറ്റക്കു കരയുവാന് കണ്ണീരു കൂട്ടിനില്ല…
പെരുമഴക്കാലം
വൗ മഴ! ഇവിടെ മഴ പെയ്യുകയാണ്. പുത്തനുടുപ്പും പുസ്തക സഞ്ചിയുമായി കളിക്കൂട്ടുകാരിയുടെ കൈയും പിടിച്ച് ഒന്നാം ക്ലാസിന്റെ പടി കയറിയ ആ കുട്ടിക്കാലം ഓർമ്മ വരുന്നു. മഴയുടെ സംഗീതം കേട്ടു കിടന്നപ്പോൾ ഇന്നെഴുന്നേൽക്കാൻ അല്പം വൈകി! എങ്ങോ പോയ്മറഞ്ഞ ആ പഴയ മഴക്കാലം മനസ്സിൽ വന്നു നിറയുന്നു… എന്തു രസമായിരുന്നു അന്ന്!
ഇടവഴികളിലൂടെ കുത്തിയൊലിക്കുന്ന കലക്കവെള്ളത്തിൽ ഓലകൊണ്ടുണ്ടാക്കിയ ജലചക്രങ്ങൾ ഘടിപ്പിച്ച കുട്ടിക്കാലം. കരകവിഞ്ഞൊഴുകുന്ന നീരരുവിയുടെ രൗദ്രതയിൽ പരിഭവം പറഞ്ഞു മാറിനിന്ന കുട്ടിക്കാലം… മഴയൊന്നു ശമിക്കുമ്പോൾ അരുവി കൊടിയ രൗദ്രത വിട്ട് തെളിനീരായൊഴുകുമ്പോൾ തോർത്തുമെടുത്ത് പരൽമീനുകളെ പിടിക്കാൻ വട്ടമിട്ട കുസൃതിക്കാലം – ആ പർൽമീനുകൾ ഇന്നെവിടെ? അന്നവ ഒഴുക്കിനെതിരേ നീന്തുമായിരുന്നു!!
എത്രതന്നെ ഭീകരമായാലും മഴയെ ആരും വെറുക്കുന്നില്ല! അളവറ്റു സ്നേഹിക്കുന്നുണ്ടു താനും… ഓരോ വർഷവും വൻ നാശനഷ്ടങ്ങളൂണ്ടാക്കിയാണു മഴ പിൻ വാങ്ങാറുള്ളത്, മഴകൂടി പ്രളയമായാൽ, അത് ഗ്രാമങ്ങളെ വിഴുങ്ങും, മലയിടിഞ്ഞ് കുത്തൊഴുക്കിൽ ജീവിതങ്ങൾ ഒലിച്ചുപോകും… മഴകൊണ്ടുവരുന്ന പകർച്ചവ്യാധികൾ വേറെ… ദുരിതമേറെ ബാക്കിയാക്കി ഒന്നുമറിയാത്തതു പോലെ അവസാനം മഴ നടന്നകലും. എങ്കിലും നമ്മൾ പിന്നേയും മഴയെ സ്നേഹിക്കുന്നു…
മഴ ഒരു പ്രണയിനിയെ പോലെയാണ്. കാതരയായി അവൾ എന്തൊക്കൊയോ നമ്മോടു പിറുപിറുക്കുന്നു. ചുടുള്ള നിശ്വാസമായി നമുക്കവളെ അനുഭവവേദ്യമാവുന്നു… നനുനനുത്ത മഴത്തുള്ളികൾ അനിർവചനീയമായ എന്തൊക്കെയോ ആയി മനസ്സിൽ പെയ്തിറങ്ങുന്നു. മഴ ഒരു മന്ത്രമാണ്!
വരണ്ടുണങ്ങുന്ന പ്രവാസമനസ്സിനെ തഴുകിത്തലോടുന്നുണ്ട് ഈ മഴ… ജീവനറ്റു പോകുന്ന മനസ്സുകൾക്ക് പ്രതീക്ഷയും പ്രത്യാശയുമാണീ മഴ… മഴ പെയ്യുന്നതിപ്പോൾ മനസ്സിലാണ്. വിഹ്വലതകൾ നിറഞ്ഞ ഹൃദയത്തിനു പുത്തനുണർവായി, പുതുജീവനായി അതു പെയ്യട്ടെ!! നിറഞ്ഞു പെയ്യട്ടെ!!
എൻഡോ സൾഫാൻ നിരോധിക്കുക
സുന്ദരങ്ങളായ കാസർഗോഡൻ മലയോരങ്ങളിൽ വിഷമഴയായി പെയ്തിറങ്ങിയ എന്ഡോസള്ഫാന് നിരോധിക്കണമെന്നാവശ്യപ്പെട്ട് മലയാളമൊട്ടാകെ ജ്വലിച്ചുയരുകയാണ്. അതു നിരോധിക്കണമെന്നുള്ള ആവശ്യം രോക്ഷാഗ്നിയായി പടന്നു കയറുന്നു. കൊടിയ വിഷമാണെന്നെല്ലാ രാഷ്ട്രീയപാർട്ടിക്കാരും തലകുലുക്കി സമ്മതിക്കുമ്പോഴും അതിനെ നിരോധിക്കാനുള്ള വഴികൾ യാതൊന്നും ചെയ്യാതെ വീണ്ടും വീണ്ടും അതിനേക്കുറിച്ച് പഠിക്കാനായി ആളുകളെ അയക്കുകയാണു വേണ്ടപ്പെട്ടവർ! എൻഡോ സൾഫാൻ എന്നത് ശരിയോ തെറ്റോ എന്നതല്ല വിഷയം; മിനിമം പഠന റിപ്പോർട്ടുകളുടെ അടിസ്ഥാനത്തിലെങ്കിലും വേണ്ടപ്പെട്ട തീരുമാനങ്ങൾ എടുക്കുക, നല്ല ക്ലാസുകൾ വെച്ച് ഇതുമായി ബന്ധപ്പെട്ടവർക്ക് വിവരങ്ങൾ നൽകുക എന്നതാണ്.
എനിക്കു തോന്നുന്നത് നമുക്കിപ്പോൾ ആവശ്യം പഠന റിപ്പോർട്ടുകളല്ല; അതൊരുപാടു കിട്ടിക്കഴിഞ്ഞിട്ടുണ്ട്. സംഗതി വിഷമയമാണെങ്കിൽ, ആ വിഷത്തിന്റെ പരിപൂർണമായ നിരോധനവും ദുരിതബാധിതരുടെ പുനരധിവാസവുമാണു നമുക്കുവേണ്ടത്. ഇതു സത്യമെങ്കിൽ അമേരിക്കൻ കുത്തകകളുടെ കോർപ്പറേറ്റ് താല്പര്യങ്ങൾക്ക് ഇരകളായിത്തീര്ന്ന ഈ മനുഷ്യരോട് അല്പം പോലും അനുഭാവം കാണിക്കതെ സ്വന്തം ജനതയോട് യുദ്ധം പ്രഖ്യാപിക്കുന്ന ഒരു കേന്ദ്രഭരണകൂടം വേറേതു നാട്ടിൽ കാണും – നമുക്കല്ലാതെ? ഒരു തലമുറയെ അപ്പാടെ നശിപ്പിക്കുന്ന ആ വിപത്തിനെതിരെ ശക്തമായ ഭാഷയിൽ തന്നെ ശബ്ദിക്കേണ്ടിയിരിക്കുന്നു എന്നതാണു മുഖ്യം. കമ്മീഷൻ വാങ്ങിച്ച് കീശവീർത്ത പവാറുമാരെ ഇനിയും ഉറ്റുനോക്കുന്നതിൽ അർത്ഥമില്ല. നമ്മുടെ പ്രതിക്ഷേധം ശക്തമായി തന്നെ അറിയിക്കേണ്ടിയിരിക്കുന്നു.
“എൻഡോ സൾഫാൻ നിരോധിക്കുക” ഇതാവട്ടെ നമ്മുടെ മുദ്രാവാക്യം.
