വെബ്‌ ഡിസൈനേർസിനെ ആവശ്യമുണ്ട്!!

നിരവധി ഒഴിവുകളാണ് വെബ്‌ ഡിസൈനേർസിനെ തേടി വരുന്നത്. പക്ഷേ, അതിനു വേണ്ട ടെക്നോളജി അറിയുന്ന ആൾക്കാർ താരതമ്യേന വളരെ കുറവാണ്. യാതൊരു വിധ വർക്ക് ലോഡോ, ടെൻഷനോ അനുഭവിക്കേണ്ടതില്ലാത്ത ഒരു രംഗമാണ് വെബ് ഡിസൈനറുടേത്. പക്ഷേ, ദൗർഭാഗ്യകരമെന്നു പറയട്ടെ ഈ രംഗം ഇന്നു വളരെ ശുഷ്‌കമാണ്. പെൺ സാന്നിദ്ധ്യം അശേഷം ഇല്ലെന്നു തന്നെ പറയാം. പെൺകുട്ടികൾ ടെൻഷൻ ഫ്രീ എന്നു പറഞ്ഞു നടത്തുന്ന ടെസ്റ്റിങ് പഠിക്കാനായാണു നെട്ടോട്ടമോടുന്നത്.

ഗ്രാഫിക്‌സ് വർക്ക് അറിയുന്ന ആളുകൾ നാട്ടിൽ ചവറുപോലെയാണ്… സകല അലമ്പ് സോഫ്‌റ്റ്‌വെയറുകളും പഠിച്ച് തേരാപാര നടക്കുന്നുണ്ട്. ഫോട്ടോഷോപ്പ്, കോറൽഡ്രോ, ഇല്ലു‌സ്ട്രേറ്റർ, അനിമോ, മായ, ആഫ്‌റ്റർ എഫക്‌റ്റ്സ് എന്നിങ്ങനെ പരസ്പരം ബന്ധപ്പെട്ടതും പുലബന്ധം പോലും ഇല്ലാത്തതുമായ എല്ലാ സോഫ്‌റ്റ്‌വെയറുകലും പഠിച്ചുകഴിഞ്ഞ് സ്റ്റുഡിയോയിൽ മാസം 3000 രൂപയ്ക്ക് ആൽബങ്ങൾ ഉണ്ടാക്കി കഴിയുന്ന ആൾക്കാർ നിരവധിയാണ്… ഇത്ര ക്യാഷ് കൊടുത്തു പഠിച്ചതിന്റെ ഫലമില്ലാതെ പോയി എന്നവർ നിത്യം പരിതപിക്കുന്നു.

വർഷാവർഷം കോളേജിൽ നിന്നും വിരിഞ്ഞു വരുന്ന എം.സി.എ, ബി.ടെക് വിദ്യാർത്ഥികളും ഇപ്പോൾ എത്രയോ കൂടി വരുന്നു. അവരുടെ കാര്യവും അങ്ങനെ തന്നെ, .നെറ്റ് അറിയാം ജാവ അറിയാം പി.എച്ച്. പി. അറിയാം സകലമാന വെബ് ടെക്നോളജികളും അറിയാം; പക്ഷേ ഒരു കുഴപ്പമുണ്ട് അവർക്ക് HTML എന്തെന്നറിയില്ല, Javascript എങ്ങനെ ഉപയോഗിക്കണം എന്നറിയില്ല; CSS എന്നത് കേട്ടിട്ടു പോലും ഇല്ല…!! ഏതെങ്കിലും ഒരു ഫ്രെയിംവർക്കു കിട്ടിയാൽ അവർ ഒരു വെബ്‌സൈറ്റ് ഉണ്ടാക്കി കയ്യിൽ തരും!! അത്ഭുതകരമായ വൈജിത്ര്യം – വൈരുദ്ധ്യം!!

കോളേജുകളിൽ ഒന്നും തന്നെ ബേസിക്കായിട്ടുള്ള HTML, CSS, Javascript എന്നിവയെ പറ്റി പഠിപ്പിക്കുന്നില്ല എന്നു തോന്നുന്നു. സമർത്ഥരായ വിദ്യാസ്ഥികളതു സ്വയം പഠിച്ചെടുക്കുന്നു. അതുപോലെ തന്നെ ഡിസൈനിങിനാവശ്യമായ ഒരു സോഫ്‌റ്റ്‌വെയറുകളും നമ്മുടെ പ്രൊഫഷണൽ കോളേജുകളിൽ പഠിപ്പിക്കുന്നില്ല. അതും സ്വയം പഠിച്ചെടുക്കണം… സെമസ്റ്റർ, പ്രോജക്‌റ്റ്, വൈവ, ക്യാമ്പസ് ഇന്റർവ്യൂകൾ, ബാങ്ക്‌ലോണിനെ പറ്റിയുള്ള വേവലാതി എന്നിവയ്ക്കിടയിൽ മറ്റുള്ള കാര്യങ്ങളെ പറ്റി ചിന്തിക്കാൻ തന്നെ വിദ്യാർത്ഥികൾ മടിക്കുന്നു. നേരാംവണ്ണം ഒന്നു പഞ്ചാരടിക്കാൻ പോലും സമയം കിട്ടാത്ത പാവങ്ങളാണു നമ്മുടെ വിദ്യാർത്ഥികൾ…!

ഏതൊരു നാട്ടുമ്പുറത്തു പോയാലും ഇന്നു ഡിറ്റിപി എന്ന പേരിലോ വെബ്‌ഡിസൈനിങ് എന്ന പേരിലോ ഫോട്ടോഷോപ്പും മറ്റും പഠിപ്പിക്കുന്ന സ്ഥാപനങ്ങൽ ഉണ്ട്. വെറും മൂവായിരം രൂപകൊടുത്താൽ അവർ ഫോട്ടോഷോപ്പിൽ മാസ്റ്റർ ആക്കി മാറ്റുകയും ചെയ്യുന്നു. എന്നാൽ ഇന്ന് ആവശ്യമുള്ളത് ഈ രണ്ടു കൂട്ടരേയും അല്ല…

അത്യാവശ്യം ഡിസൈനിങ്, അതുപോലെ HTML, CSS, Javascript ഇവയുടെ ഉപയോഗം ഇത്രയും അറിഞ്ഞിരിക്കുന്ന ഒരാൾക്ക് നല്ല വെബ്‌ഡിസൈനറാവാം. ഒരു ഡിസൈനിങ് സോഫ്‌റ്റ്‌വെയറിൽ സൈറ്റ് ഡിസൈൻ ചെയ്ത്, അത് അതേ പോലെ HTML -ലിൽ വർക്ക് ചെയ്യിപ്പിച്ചു കൊടുത്താൽ മതി. നിരവധി അവസരങ്ങൾ നിങ്ങളെ തേടിയെത്തും. HTML, CSS, Javascript പഠിക്കാൻ മറ്റ് സങ്കീർണമായ കമ്പ്യൂട്ടർ ഭാഷകൾ ഒന്നും വശത്താക്കേണ്ടതില്ല. അത്യാവശ്യം കമ്പ്യൂട്ടർ പരിജ്ഞാനം ഉള്ള ഏതൊരാൾക്കും ഒരു മാസം കൊണ്ട് ഈ പറഞ്ഞ സംഭവം പഠിച്ചെടുക്കാം.

ഗ്രാഫിക്സ് വർക്ക് ചെയ്യുന്ന ആരെങ്കിലുമൊക്കെ ഉണ്ടെങ്കിൽ നിങ്ങൾ ഈ മൂന്നു സാധനം കൂടി ഉടനേ വശത്താക്കുക. എന്നിട്ടൊന്നു മാർക്കറ്റിലേക്ക് ഇറങ്ങിനോക്ക്! ഇതു പഠിക്കാൻ കമ്പ്യൂട്ടർ ഡിഗ്രികളുടെ ആവശ്യം ലവലേശമില്ല; ഇനി മലയാളം എം.എ. ആണു നിങ്ങൾ കഴിഞ്ഞതെങ്കിൽ കൂടി ധൈര്യമായി ശ്രമിച്ചോളൂ 🙂
ഒരുമാസത്തിനപ്പുറം മെനക്കെടേണ്ടി വരില്ല ഇവ പഠിക്കാൻ!! അപ്പോൾ ഇന്നു തന്നെ എല്ലാ ഗ്രാഫിക്സ് പുലികലും HTML പഠിക്കാൻ ഇറങ്ങിക്കോളൂ… ഭാവുകങ്ങൾ!!