December 9, 2008 - Rajesh Odayanchal

ആരുനീ നിശാഗന്ധേ!

നിസ്തരംഗമം അന്ധ
കാരത്തിന്‍ പാരാവാരം;
നിസ്തബ്ധ താരാപുഷ്പ
വ്യോമശിംശിപാശാഖ;

ചുറ്റിലും നിഴല്‍നിശാ-
ചരികളുറങ്ങുന്നു;
മുറ്റിയൊരേകാന്തത,
ശൂന്യത,വിമൂകത.

കൊമ്പിലെയിലകളി-
ലൊളിച്ച ഹനൂമാന്റെ-
യമ്പിളിക്കലത്താടി-
യിടയ്ക്കു കാണും മായും;

ആരുനീ നിശാഗന്ധേ
നടുങ്ങും കരള്‍ വിടര്‍-
ന്നോരു ഭീരു, നിന്‍ ദീര്‍ഘ-
ശ്വസിതസുഗന്ധങ്ങള്‍

പാവനമധുരമാ-
മൊരു തീവ്രവേദന
പാരിന്റെയുപബോധം
തഴുകിയൊഴുകുന്നു!

സ്നേഹവിദ്ധമാമന്തഃ
കരണം രക്തം വാര്‍ന്നും,
മോഹത്തിലാണ്ടും ‘പാപം,
പാപമെ’ന്നുടക്കവേ

ലോകപ്രീതിക്കും രാജ-
നീതിക്കും തലചായ്ച
ലോലനും കഠിനനു-
മാകിന പുരുഷന്റെ

മുന്‍പില്‍നിന്നകംപിളര്‍-
ന്നിള നല്‍കിയോരിടം
കൂമ്പിന പൂങ്കയ്യോടെ
പൂകിയ മണ്ണിന്‍മകള്‍

നെടുവീര്‍പ്പിടുകയാം;
ആ വ്രണിതാത്മാവാവാം
വിടരുന്നതു നിന്നില്‍
രഹസ്സില്‍, നിശാഗന്ധേ!

By : ജി. ശങ്കരക്കുറുപ്പ്‌

G Sankarakurup / kavitha / malayalam / poem / ആരുനീ നിശാഗന്ധേ / ജി. ശങ്കരക്കുറുപ്പ്‌ poem / കവിത / ജി ശങ്കരക്കുറുപ്പ് /

Leave a Reply

Your email address will not be published. Required fields are marked *